مصر ضااااااعت يا رجاله .....

منذ أو وعينا على صدر الحياة ونحن ندرس في المدارس في كتب التاريخ ان مصر مستهدفة دائماً من قبل القوى الاستعمارية نظراً لما لها من موقع استراتيجي مميز وأرض خصبة وموارد طبيعية غامرة ، ومنذ أن حرر أحمس مصر من الهكسوس في عهد الفراعين القدامى ومصر دائما ما تحتلها القوى الخارجية ويظهر بطل قومي يحررها من الاستعمار .. وسمعنا عن ثورة يوليو ولم نسعد بأن نحضرها لأننا الجيل الجديد الذي لم يعرف عن الكفاح إلا شوية صور وأفلام تسجيلية وكلام الناس بتوع زمان ، نحن جيل الانترنت والفضائيات والموبايل بتاع أبو كاميرا اللي زود الطينة بلة وخلى مفيش حاجة تستخبى والأب اللى خايف على بنته ح يبقى مش مطمن عليها حتى لو حبسها في أوضتها ، المهم ده مش موضوعنا ، الخريجين بمئات الآلاف سنوياً .. الشاب الغلبان من دول قبل ما يتخرج من الكلية بيعمل شيء من اثنين ، يا إما يقعد على القهوة يشيش أو على النت يدردش ، يا إما يدور على شغلانه في سايبر أو سنترال يشتغل فيه بـ 120 جنيه في الشهر.. طيب ليه يا جماعة ما البلد فيها شغل يا جماعة " وده كلام الحكومة طبعاً " .. طيب ايه السبب في ان الخريجين الغلابة مش لاقيين شغل؟ .. أحب أقول ان القطاع الحكومي بيتباع وبيتحول خاص ، وطبعاً رجل الأعمال أو مجموعة رجال الأعمال اللى اشتروا الشركة القطاع العام مش عايزين يدفعوا المرتبات الكبيرة للناس القديمة اللى شغالين فيها .. يعنى الموظف اللي بقاله 20 سنة شغال في القطاع الحكومي بيقبض مرتب 650 جنيه في الشهر ، المبلغ ده بيعتبره الباشاوات اللي اشتروا الشركة القطاع العام مبالغ فيه جدا .. وطبعاً الموظف الغلبان يا اما يقبل ياخد قرشين بالسلامة على بيتهم يا اما يوافق يشتغل بعقد عمل سنوى بـ300 جنيه ، ويا ولداه بعد الراجل ما كان مؤمن على ان داخل لبيته وعياله 600 جنيه شهرياً عايش بيهم بالزق يلاقي نفسه محتاج يشتغل شغل تاني بعد ما يرجع من شغله ويفضل يا عيني المواطن الغلبان يشتغل طول اليوم ويمكن كمان ما يلاقيش غير ساعتين بس ينامهم عشان يروح شغله تاني يوم .. المهم أن هذه القضية تعتبر قضية الفئة الغالبة من الشعب المصري الغلبان ولا اقصد بها أصحاب السيارات وأرصدة البنوك المتخمة بأقام أمامها ستة أو سبعة أو ثمانية أصفار.. وفي المقابل المواطن الغلبان المطحون إذا عمل على حسابة على 600 ينام ويقوم يلاقي الأسعار ارتفعت ومن الضروري أن تصير الـ600 إلى 700 وربما 800. طيب إيه العمل يا جماعة لازم يكون في حل .. الكلام كتير .. ياريت اللى عنده حل يقوله عشان أنا خلاص فااااااااض بيا .. وللحديث بقية...!!!